Буянтын хөндий шарын гол" бичил уурхайн төрийн бус байгууллагын үйл ажиллагаатай танилцлаа
Дархан-Уул аймгийн ИТХ-ын 7 дахь удаагийн сонгуулийн ээлжит бус 10 дугаар Хуралдаанаар /2018.02.28/ бичил уурхайн зориулалтаар орон нутгийн тусгай хэрэгцээнд газар авах тухай асуудлыг хэлэлцэн баталсан. Энэ дагуу орон нутгийн тусгай хэрэгцээнд 5 жилийн хугацаатайгаар авах тогтоолыг баталж, тусгай хэрэгцээнд авсан газрыг зориулалтын дагуу ашиглуулах, ашиглалтын явцад хяналт тавьж, тогтоолын хэрэгжилтийг жил бүр аймгийн Иргэдийн Төлөөлөгчдийн Хурлын хуралдаанд танилцуулж ажиллахыг холбогдох албаныханд үүрэг болгосон билээ. Энэ дагуу өнөөдөр /2018.05.31/ Монгол улсын Их хурлын гишүүн Д.Хаянхярваа, аймгийн Засаг дарга С.Насанбат, Шарын гол сумын Засаг дарга Д.Амарсанаа нар Шарын гол суманд үйл ажиллагаа явуулж байгаа "Буянтын хөндий шарын гол" бичил уурхайн төрийн бус байгууллагын үйл ажиллагаатай газар дээр нь танилцсан юм. Тус төрийн бус байгууллагат өнөөдрийн байдлаар Дархан сумын 120, Хонгор сумын 20, 350 гаруй Шарын гол сумын иргэд гээд нийтдээ 70 бригадын 500 орчим иргэн ажлын байраар хангагдаж өөрсдийн гэсэн орлоготой болж байна. Тэд хөдөлмөрийн аюулгүй байдлаа хангах үүднээс сургалтад хамрагдаж өглөө бүр зааварчилгаа аван ажилдаа гардаг ажээ. Мөн өөрсдийн гэсэн цахим үнэмлэхтэй болж зөрчил гаргасан тухай бүрд үнэмлэхийг цоолж 3 удаа болсон тохиолдолд шууд халагдах нөхцөлтэй юм байна. Түүнчлэн эрүүл мэндийн даатгалд хамрагдахын зэрэгцээ 7 хоног бүрийн нэг өдөр амарч байхаар болжээ. 24 цагийн байнгын харуултай бөгөөд өглөөний 07.00 цагаас ажилдаа гарч оройн 20.00 цагт амардаг байна. тус төрийн бус байгууллагын үйл ажиллагаатай танилцсан удирдлагууд хөдөлмөрийн аюулгүй байдлаа сайн хангахын зэрэгцээ нөхөн сэргээлтийг иж бүрэн хийхийг дахин санууллаа. Цаашдаа бичил уурхай хэрхэн нэгдсэн зохион байгуулалтад орж ажиллаж болдгийг харуулахыг хүссэн юм. Бичил уурхайчид бол холбогдох хууль журмын хүрээнд зохион байгуулалтад орж, тухайн сумынхаа Засаг даргатай гэрээ байгуулан, албан ёсоор дүгнэлт нь гарсан газар аюулгүй байдлаа хангаж ажиллаж байгаа хүмүүсийг хэлж байгаа. Мөн тухайн газартаа олборлолт явуулаад, нөхөн сэргээлтээ өөрсдөө хийн буцааж хүлээлгэн өгдөг, Хоргүй технологи ашигладаг, Монгол банканд алтаа тушаадаг хүмүүсийг хэлдэг.
