Шатахууны үнэд дөрлүүлсэн инфляц
Статистикчид өчигдөр мэдээлэл хийв. Инфляц өнгөрсөн сард 0.5 хувиар өссөн аж. Үүнд шатахууны үнийн өсөлт нөлөөлсөн гэдгийг тэд онцлов. Тодруулбал, нийт өсөлтийн 43 хувь нь зөвхөн шатахууны үнийн өсөлттэй холбоотой аж. Үүнтэй зэрэгцэн шатахууны үнэ дахин өснө гэх "шуум” гараад эхэлжээ.
Өнгөрсөн нэгдүгээр сард ШӨХТГ-аас зохиомлоор шатахууны хомсдол үүсгэн үнээ нэмсэн хэмээн импортлогчдыг буруутгаж байсан. Тухайн үед ШӨХТГ-ын дарга Б.Лхагва "Улс орон даяар хиймэл хомсдол үүсгэж шатахууны үнийг нэмсэн байна. ШӨХТГ-аас өнгөрсөн оны дөрөвдүгээр сард шатахуун импортлогч аж ахуйн нэгжүүдийн төлөөлөлтэй уулзаж, тэдний санал хүсэлтийг сонсч, хууль тогтоомжийн хүрээнд хэрхэн ажиллах зөвлөмжийг өгсөн” хэмээж байсан. Тэрээр төр хувийн хэвшил, иргэний нийгмийн байгууллагын төлөөлөл оролцсон хамтарсан зөвлөл шатахууны хангамж, үнийн нэмэгдэлтэй холбоотой асуудлаар ажиллаж байхад хомсдол үүсгэж, үнэ тарифтай холбоотой өөрчлөлт оруулах боломжгүй гэж үзэж байгаагаа илэрхийлж байсан.
Найр наадам, амралтын сиймхийг нь ашиглаж байгаад аажим, аажмаар үнээ өсгөж буй шатахуун импортлогч компаниудад захирагдах захиргаа гэж байдаггүй мэт авирлах. Үнэн хэрэгтээ "Өрсөлдөөний тухай хуулийн хүрээнд Засгийн газар, хувийн хэвшил хамтарсан ажлын хэсэг 2016 оноос хойш ажиллаж байна. Өнгөрсөн хугацаанд долоон удаа хуралдаж, үнэ тарифт өөрчлөлт оруулах, татварыг бууруулах өсгөх тухай шийдвэр гаргаж ирсэн. Үнэ тариф нэмэх асуудлаар нефть импортлогч компаниуд байнга санал тавьж ирсэн ч Засгийн газар тухай бүрт нь тодорхой арга хэмжээ авсаар ирсэн. Хомсдол үүсгэж, хязгаарлалт тогтоож, удаа дараа зөрчил гаргасан зарим аж ахуйн нэгжийн эрхийг түдгэлзүүлэх саналыг манай газраас гаргаж байна” хэмээн Б.Лхагва дарга ярьж байжээ.
Харин энэ удаад үнэ нь өсч байгааг нь анзаарах сөхөө Засгийн газарт ч, ШӨХТГ-т алга бололтой. Таг чиг суусаар намрын их ажилтай золгох нь. 10 гаруйхан хоногийн дараа хичээлийн шинэ жил эхлэнэ. Үүнтэй зэрэгцэн ургац хураалт ч эхлэхээр төлөвлөгдөж байгаа аж. Харин албан тушаалтнууд хэрхэх гэж буйг таашгүй. Инфляцийн өсөлтөд голлох нөлөө үзүүлж буй шатахууны үнийг хазаарлах чадамж Засгийн газарт байна уу?
Д.Оюунчимэг
Эх сурвалж: "Зууны мэдээ” сонин
