Хойд бүсийн өвлийн тусгай олимп болов
Аймгийн Засаг даргын нэрэмжит "Хойд бүсийн өвлийн тусгай олимп” өчигдөр /2016.03.09/ боллоо. Тус олимпийг JCI Дархан салбар байгууллага нь "Ялалт байгуулахад чинь БИД туслая” төслийн хүрээнд 2017 онд Австри улсад зохион байгуулагдах "Дэлхийн тусгай олимп”-ийн өвлийн наадамд оролцох тамирчдыг Хойд бүсээс тодруулан Улсын хэмжээний сорилд оролцуулах зорилготойгоор зохион байгуулсан юм.
Тэмцээнд Дархан-Уул, Архангай, Өвөрхангай, Орхон, Булган, Сэлэнгэ зэрэг аймгуудын оюуны бэрхшээлтэй 30 гаруй хүүхдүүд оролцож 100м-ийн Гүйлтийн цана, 100м-ийн Цасны гуталтай гүйлт гэсэн төрөлд авхаалж самбаагаа сорилоо. Зохион байгуулагчийн зүгээс өнөөдрийн олимп нь оюуны бэрхшээлтэй хүүхэд залуусыг спортоор хичээллэхэд урам дэм өгөх, авьяас чадвараа хөгжүүлэх, хоорондоо нөхөрлөхөд ихээхэн ач холбогдолтойг онцлов. "Хойд бүсийн өвлийн тусгай олимп”-ийг Монголын тусгай олимпын хороо, Дархан-Уул аймгийн ЗДТГ, Энэрэл цогцолбор сургууль, аймгийн БТС газар хамтран зохион байгууллаа.
Эх сурвалж: http://darkhan.gov.mn/
